TCH Events‎ > ‎

به‌وریاییه‌وه‌ ئه‌نسۆلینی نه‌خۆشی شه‌كره‌ به‌كاربهێنن

posted Apr 1, 2018, 2:36 AM by Media TCh

ئه‌نسۆلین (insulin glargine) هۆرمۆنێكی تایبه‌تمه‌ندی كه‌م كه‌ره‌وه‌ی رێژه‌ی شه‌كری خوێنه‌ كه‌ له‌لایه‌ن كۆمپانیا تایبه‌تمه‌نده‌كانی جیهانه‌وه‌ دروستكراوه‌ بۆ چاره‌سه‌ر كردنی هه‌ردوو جۆری شه‌كری یه‌ك (insulin-dependent) و شه‌كری جۆری دوو (non insulin-dependent) ، له‌گه‌ڵ ئه‌وه‌شدا كه‌ ئه‌م چاره‌سه‌ره‌ رۆڵێكی گرنگی هه‌یه‌ له‌ دابه‌زاندنی رێژه‌ی گلوكۆزی خوێن له‌ مرۆڤدا، به‌ڵام ئه‌م كاریگه‌رییه‌ لاوه‌كییانه‌ی خواره‌وه‌شی هه‌یه‌ كه‌ پێویسته‌ به‌ وریاییه‌وه‌ به‌كاربهێنرێت:

1-كه‌مكردنه‌وه‌ی رێژه‌ی شه‌كری خوێن بۆ خوار ئاستی سروشتی خۆی، كه‌ ئه‌مه‌ش پێی ده‌وترێت (hypoglycemia)و له‌هه‌ر كاریگه‌رییه‌ لاوه‌كییه‌كانی ئه‌م جۆره‌ ده‌رمانه‌ (هۆرمۆنه‌)یه‌، كه‌ ئه‌گه‌ر بێتو له‌ ژێر چاودێری پزیشكی پسپۆردا یان كه‌سانی شاره‌زای بواری ته‌ندروستیدا به‌كارنه‌هێنرێت، له‌وانه‌یه‌ كاره‌ساتی گیان له‌ده‌ستدانی لێ بكه‌وێته‌وه‌، بۆیه‌ پێویسته‌ له‌سه‌ر ئه‌و كه‌سانه‌ی كه‌ ئه‌م ده‌رمانه‌ به‌كارده‌هێنن پابه‌ند بن به‌ سه‌رجه‌م ئه‌و رێنماییه‌ ته‌ندروستییانه‌ی كه‌ له‌لایه‌ن پزیشكه‌ پسپۆره‌كانیانه‌وه‌ پێان ده‌وترێت و به‌وردی ئاگاداری ئه‌و یه‌كه‌ پێوانه‌ییانه‌ بن كه‌ بۆیان دیاری كراوه‌.
2-جگه‌ له‌م كاریگه‌رییه‌ لاوه‌كییه‌ سه‌ره‌كییه‌ش، له‌وانه‌یه‌ هه‌ندێك جار نه‌خۆشه‌كه‌ تووشی سه‌ر ئێشه‌و بێتاقه‌تی و ده‌ست له‌رزین و ئاره‌ق كردنه‌وه‌و هه‌ناسه‌وبڕكێ و دڵه‌ كوتێ و سه‌رگێژبوون و چه‌ند حاڵه‌تێكی تر ببێت.
3-له‌شوێنی لێدانی ده‌رزیه‌كه‌ له‌وانه‌یه‌ هه‌ندێك جار ئازارو سوور بوونه‌وه‌و هه‌ڵئاوسان و خوران دروست ببێت، به‌ڵام له‌وانه‌یه‌ له‌ماوه‌ی چه‌ند رۆژێكدا ئه‌م كاریگه‌رییه‌ لاوه‌كییانه‌ نه‌مێنن.
4-پێویسته‌ له‌سه‌ر ئه‌و كه‌سانه‌ی كه‌ ئه‌مجۆره‌ هۆرمۆنه‌ به‌كارده‌هێنن، زانیاری ته‌واو له‌سه‌ر ئه‌و كاریگه‌رییه‌ لاوه‌كییانه‌ به‌ پزیشكه‌ پسپۆره‌كه‌یان بڵێنه‌وه‌، هه‌روه‌ها سه‌رجه‌م ئه‌و ده‌رمانانه‌ی كه‌ به‌كاری ده‌هێنن له‌ژیانی رۆژانه‌یاندا پزیشكه‌كه‌یانی لێ ئاگادار بكه‌نه‌وه‌، چونكه‌ هه‌ندێك ده‌رمانی تایبه‌تمه‌ند له‌وانه‌یه‌ كاریگه‌ری لاوه‌كی هه‌بێت له‌سه‌ر كاری ئه‌م هۆرمۆنه‌ ده‌ستكرده‌ له‌ناو له‌شی نه‌خۆشه‌كه‌دا.

راگه‌یاندنی كۆلیجی ته‌كنیكی ته‌ندروستی



Comments